Vigilia 'e Natale

Fa friddo. Manco n'anema p' 'a strata

ianca p' 'o friddo: sola, a nu puntone

tremma na gatta sperza e abbandunata

scavanno mmiez' 'e ppenne 'e nu capone.


Ha già luvato mano 'o mastedascio,

'a zacrellara tras' 'a bancarella

cu ll'urdeme pasture e nzerr' 'o vascio,

vasanno da luntano 'a Madunnella.

Int' 'a parrocchia, abbascio, l'organista

sona na ninna nanna doce doce

e Giretiello, 'o figlio d' 'a mudista,

s' 'a ripassa cantanno sottovoce.

'A sacrestana, ncoppa, sta stiranno

càmmese ricamate, ammitte e cotte

e 'o parrucchiano lava cu nu panno

'o Bammino p' 'a messa 'e mezanotte.

Mentre se chiamm' 'a bonafficiata

d' 'a puteca appannata d' 'o furnaro

saglie n'addore 'e pigne e dint'a n'ata

more 'a nuvena de nu zampugnaro.

Pare ch' 'o munno appena risciatasse

aspettanno a Giesù, pararrie quase

ch'ogne vota ca nasce riturnasse

n'aria serena dint'a tutt' 'e ccase.

Ma non torna pe me: mentre p' 'a stanza

smanio, passeo, m'assetto e scrivo vierze,

sciure sguigliate frische 'a na speranza

ch'arracquo ancora cu lacreme perze,

tu faccia 'e santa e core d'assassina

ll'uocchie appapagne pe cumpassione,

ma cu 'a manella dellicata e fina

scanne nu pullo o taglie 'o capitone!

(Da "Napule Napulitana", di Raffaele Bagnulo)